താറാവുകളെ അടുക്കളമുറ്റത്തും വളര്‍ത്താം

വീട്ടമ്മമാര്‍ക്ക് സ്വയം തൊഴില്‍ എന്ന നിലയില്‍ വീട്ടുമുറ്റത്തും താറാവുകളെ വളര്‍ത്തി ആദായം ഉണ്ടാക്കാം. ഏപ്രില്‍ മുതല്‍ ജൂലായ് മാസങ്ങളില്‍ വിരിയുന്ന കുഞ്ഞുങ്ങള്‍ ഏഴ് മാസമാകുമ്പോഴും സപ്തംബര്‍ മുതല്‍ ജനവരി വരെ വിരിയുന്നവ ഒന്ന്, രണ്ട് മാസം മുമ്പും പ്രായപൂര്‍ത്തിയാകുന്നു. 

ഏപ്രില്‍ ജൂലായ് മാസങ്ങളില്‍ സൂര്യപ്രകാശം താരതമ്യേന കുറവും സപ്തംബര്‍ ജനവരി മാസങ്ങളില്‍ ചൂട് കൂടുതലുമായി അനുഭവപ്പെടും. വളര്‍ച്ചയ്ക്ക് ചൂട് വളരെ ആവശ്യമാണെന്ന് ഇതില്‍ നിന്ന് മനസ്സിലാക്കാം. ആദ്യത്തെ ഒരാഴ്ച 31ഡിഗ്രി സെന്റിഗ്രേഡ് ചൂട് കൂടുകളില്‍ നല്‍കണം. 

ഓരോ ആഴ്ചയും മൂന്നു ഡിഗ്രി സെന്റിഗ്രേഡ് വീതം കുറയ്ക്കണം. 24 ഡിഗ്രി സെന്റിഗ്രേഡ് ആകുന്നതുവരെ ഇത് തുടരണം. 24 ഡിഗ്രിയില്‍ എത്തിയാല്‍ പിന്നീട് കുറക്കേണ്ടതില്ല. പതിനാറ് ആഴ്ചവരെ ഇത് തുടരണം. ആറ്് പിടകള്‍ക്ക് ഒരു ആണ്‍താറാവ് എന്ന തോതിലാണ് വളര്‍ത്തേണ്ടത്. ആറ്, ഏഴ് മാസമാകുമ്പോള്‍ ഇവ മുട്ടയിട്ടു തുടങ്ങും.

തീറ്റ നനച്ച് നല്‍കുന്നതാണ് നല്ലത്. ആദ്യത്തെ എട്ട് ആഴ്ച തുടര്‍ച്ചയായി 24 മണിക്കൂറും തീറ്റ നല്‍കുക. അതിനുശേഷം ദിവസം രണ്ടുനേരം. രാവിലെ എട്ടുമണിക്കും. വൈകുന്നേരം അഞ്ച്മണിക്കും ഒരു താറാവിന് 120-160ഗ്രാമം തീറ്റ നല്‍കാം. പകല്‍ സമയം തുറന്നു വിട്ടു വളര്‍ത്തുകയാണെങ്കില്‍ അവ അടുക്കള എച്ചില്‍, വിരകള്‍, ചെറിയ പ്രാണികള്‍, എന്നിവ തിന്നും.

അതിരാവിലെയാണ് താറാവുകള്‍ മുട്ടയിടുന്നത്. മുട്ടയുടെ തൂക്കം 65-70ഗ്രാം. മുട്ടയിട്ട് തുടങ്ങി അഞ്ചുമാസത്തിന്ശേഷം ഉത്പാദന വര്‍ധന. ഓരോ താറാവിനും 10 സെ.മീ വീതം സ്ഥലം തീറ്റ കഴിക്കുന്നതിന് നല്‍കണം. മുട്ടയിടുന്നതിനായി 30 സെ.മീ. വീതി, 45 സെ.മീ. ആഴം, 30 സെ.മീ ഉയരം എന്ന തോതില്‍ നെസ്റ്റ് ബോക്‌സ് നിര്‍മിച്ച് നല്‍കണം.

വെള്ളം കുടിക്കുന്നതിനുവേണ്ടി 60.സെ.മീ. വീതിയും 30 െസ.മീ ആഴത്തിലുമുള്ള സൗകര്യം ഉണ്ടാക്കണം. മൂന്നുനാല് ആഴ്ചവരെ കുഞ്ഞുങ്ങളെ ബ്രൂഡറില്‍ വളര്‍ത്തണം. ഒന്നിന് തീറ്റയ്ക്ക് 90-100 ചതുരശ്ര സെ.മീറ്റര്‍ സ്ഥലം അനുവദിക്കണം. കുടിക്കാനുള്ള വെള്ളപ്പാത്രത്തിന് 5-7.5 സെ.മീറ്റര്‍ ആഴം ആകാം. അധികമായാല്‍ ഇവ വെള്ളപ്പാത്രത്തില്‍ ഇറങ്ങി കളിച്ച് വെള്ളം മലിനമാക്കും. 

പരിസരം വൃത്തിയായി സൂക്ഷിക്കണം. രോഗബാധ വരാതെ നോക്കണം. 8-12 ആഴ്ച പ്രായത്തില്‍ താറാവ് വസന്തെയ്ക്കതിരെ കുത്തിവെപ്പ് നടത്തണം. താറാവ് കോളറയ്‌ക്കെതിരെ 3, 4 ആഴ്ചപ്രായത്തിലും കുത്തിവെപ്പ് എടുക്കണം.

Courtesy ; Mathrubhumi